मेरि ब्वै खुणै नि आइ मदर्स डे (गढ़वाली कविता)

पयाश पोखड़ा //

मेरि तींदि गद्यलि निवताणा मा,

मेरि गत्यूड़ि की तैण रसकाणा मा,

लप्वड़्यां सलदरास उखळजाणा मा,

मेरि ब्वै खुणै, नि आइ मदर्स डे ||

सर्या राति मेरि पीठ थमथ्याणा मा,

मि सिवळणा को बेमाता बुलाणा मा,

सिर्वणा दाथि कण्डळि लुकाणा मा,

मेरि ब्वै खुणै, नि आइ मदर्स डे ||

बिसगीं दूदी फर ल्वै चुसाणा मा,

पैनी हडक्यूं की माळा बिनाणा मा,

अफु रुंदा रुंदा भि मी बुथ्याणा मा,

मेरि ब्वै खुणै, नि आइ मदर्स डे ||

तातु पाणि परतिम स्यळाणा मा,

फेरि मनतता पाणिम नवाणा मा,

बाढ़ ज्वनि, बाढ़ बाढ़ करणा मा,

मेरि ब्वै खुणै, नि आइ मदर्स डे ||

धकि धैं धै कैरिक नचाणा मा,

था ले,था ले बोलिक हिटाणा मा,

खुट्यूं छुणक्या धगुलि पैराणा मा,

मेरि ब्वै खुणै, नि आइ मदर्स डे ||

मेरि जूंका की दवै ल्याणा मा,

द्यप्तों का ठौ मा मुण्ड नवाणा मा,

धौ संदकै मीथैं मंथा मा ल्याणा मा,

मेरि ब्वै खुणै, नि आइ मदर्स डे ||

खटुला फर मेरि खुटळि लगाणा मा,

डांडौं बटैकि घास लखुड़ु ल्याणा मा,

छनि म गौड़ि भैंस्यूं थैं पिजाणा मा,

मेरि ब्वै खुणै, नि आइ मदर्स डे ||

गुड़ गट्टा नौणि रोटि खवाणा मा,

छंछ्या कि थकुलिम लूण रलाणा मा,

लाटा, हौरि खा, हौरि खा ब्वलणा मा,

मेरि ब्वै खुणै, नि आइ मदर्स डे ||

मेरि पाटि ब्वळख्या सजाणा मा,

अधम्यरम तक इसकोल फट्याणा मा,

इसकोल आंदा जांदा अड़ाणा मा,

मेरि ब्वै खुणै, नि आइ मदर्स डे ||

किताब कौपि पिनसन ल्याणा मा,

फीसी कि इक्कैक पैसि कमाणा मा,

मास्टरु का हथ खुट्टा दबाणा मा,

मेरि ब्वै खुणै, नि आइ मदर्स डे ||

दसा का इमत्यान पास करणा मा,

सर्या गौं मा भ्यलि गिंदड़ा बंटणा मा,

ऐथर नौकरि की गाणि स्याणी करणा मा,

मेरि ब्वै खुणै, नि आइ मदर्स डे ||

कर्जपात कैरि मीथैं भैर भ्यजणा मा,

अफु खै निखैकि पैसा जमा करणा मा,

च्यूड़ा अखोड़ा की कुटरि धरणा मा,

मेरि ब्वै खुणै, नि आइ मदर्स डे ||

दिन रात बौलु भुरत्या करणा मा,

स्वारा भारौं कि हींस रींस सुणणा मा,

हैळ हळ्यौ दगड़ हथपैंछि ज्वड़णा मा,

मेरि ब्वै खुण, नि आइ मदर्स डे ||

भ्यलि सिराणी नौकरि लगणा मा,

मीथैं अपणा खुटौं खड़ा करणा मा,

हुणत्यळि आस की फंचि उठाणा मा,

मेरि ब्वै खुण, नि आइ मदर्स डे ||

पेंटिंग साभार- सरोजनी डबराल ‘सरु’

हर साल बर्सफल द्यखाणा मा,

सिरफळ थै मोळि पैराणा मा,

जलम पतड़ा थैं पिठै लगाणा मा,

मेरि ब्वै खुण, नि आइ मदर्स डे ||

मैकु नौनि ब्वारी ख्वज्याणा मा,

बामणा का घौर आणा जाणा मा,

मीथै सीरा मकोट पैराणा मा,

मेरि ब्वै खुणै, नि आइ मदर्स डे ||

अपणि नथुलि बुलाक त्वड़ाणा मा,

ब्वारी खुणै गुलोबन्द बणाणा मा,

सात फूल्यूं मा पीना लगाणा मा,

मेरि ब्वै खुणै, नि आइ मदर्स डे ||

नौना कु बिगरैलि ब्वारी ल्याणा मा,

लछमि ऐलि हमर खल्याणा मा,

सर्या जिंदगि की खैरि बिसराणा मा,

मेरि ब्वै खुणै, नि आइ मदर्स डे ||

नौना ब्वारी को परदेस जाणा मा,

रंत रैबार चिठि पतरि नि आणा मा,

टपरांदा सासा लग्यां पराणा मा,

मेरि ब्वै खुणै, नि आइ मदर्स डे ||

जिंदगि की जग्वाळ करणा मा,

न म्वरणा मा अर ना बचणा मा,

आंदा-जांदा म्यारु बाटु ह्यरणा मा,

मेरि ब्वै खुणै, नि आइ मदर्स डे ||