अपण ब्वे का मैस

अपण ब्वे का मैस/

होला वो/

जो

हमरि जिकुड़ि मा

घैंटणा रैन/

घैंटणा छन

कीला/वाडा/दांदा!

जो,

हमारा नौ फर,

कागज लपोड़िकै/

फाइलों का थुपड़ा लगैकै/

कम्प्यूटर मा आंकड़ा भोरिकै/

विकास कना छन/

जो,

हम तैं उल्लू का पट्ठा समझिकै

हम तै लाटा मानिकै/

हम तैं मूर्ख समझिकै

हम तैं सीधा- सरल मानिकै

मौज-मस्ती- मटरगस्ती कैरिकै

अपणी मवासी बणाण पर मिस्यां छन

अपण ब्वेका मैस छन वो।।

कवि- स्व. पूरण पंत ’पथिक’, देहरादून (उत्तराखंड)