जग्वाळी तैं हर्याळी थैं
हिसाब द्या, हिसाब द्या
हे दुन्यादार लोखूं तुम
निसाब द्या.......
तुमरा गंदळा आसमान
हमरु हर्याळी कू ढ़क्याण
तुम, बम बणांदी रावा
हम त रोपदी जौंला डाळा
तुमारु धुळ माटु कचरा
हम बुकाणा छां दिन द्वफरा
तुमन् ओजोन भेद्याली
हम, पुणदा लगैकि डाळी
तुमरि गाड़ीं च विपदा
हमरि सैंति च संपदा
तुमरु अटलांटिक छिजदा
हमरु हिमाला जुगराज
तुमरि ल्वैछड़्या कुलाड़ी
हमरि चिपकदी अंग्वाळी
तुमुन् मनख्यात उजाड़ी
हमुन् पुन्यात जग्वाळी
हिसाब द्या...................॥
Source : Jyundal (A Collection of Garhwali Poems)
Copyright@ Dhanesh Kothari
